មណ្ឌលគិរី៖ កងទ័ពមួកខៀវកម្ពុជា បានកម្ទេចគ្រាប់មីន និងគ្រាប់យុទ្ធភ័ណ្ឌមិនទាន់ផ្ទុះជាង ២០០គ្រាប់ ព្រមទាំងអំបែងជាង ៦ម៉ឺនដុំ ដែលសេសសល់ពីសម័យសង្គ្រាមនៅក្នុងខេត្តមណ្ឌលគិរី។ គ្រាប់យុទ្ធភ័ណ្ឌទាំងនោះត្រូវបានកម្ទេចចោលនៅព្រឹកថ្ងៃទី០៤ ខែមិថុនា ឆ្នាំ២០២៣។

កងទ័ពមួកខៀវកម្ពុជា បានកម្ទេចគ្រាប់មីន និងគ្រាប់យុទ្ធភ័ណ្ឌមិនទាន់ផ្ទុះជាង ២០០គ្រាប់ និងអំបែងចំនួន ៥៦,៩៤៩ដុំ ដែលនៅសល់ពីសង្គ្រាម នៅខេត្តមណ្ឌលគិរី។ កងទ័ពមួកខៀវបានកម្ទេចចោលគ្រាប់យុទ្ធភ័ណ្ឌទាំងនោះនៅក្នុងឃុំរយ៉ ស្រុកកោះញែក ខេត្តមណ្ឌលគិរី។

ទេសរដ្ឋមន្រ្តី អនុប្រធានទី២ អាជ្ញាធរមីន និងជាអគ្គនាយកមជ្ឈមណ្ឌលជាតិ លោក សែម សុវណ្ណនី បានបញ្ជាក់ថា រដ្ឋាភិបាលបានផ្តល់ដីក្នុងខេត្តមណ្ឌលគិរីដែលមានសុវត្ថិភាពសរុបជាង ៩លានម៉ែត្រក្រឡា ដោយក្នុងនោះអ្នកជំនាញបានបោសសំអាតដីដោយយកគ្រាប់យុទ្ធភ័ណ្ឌមិនទាន់ផ្ទុះ បានចំនួនជាង ៨លានម៉ែត្រក្រឡា ស្មើនឹង ៨០ភាគរយនៃផ្ទៃដីសរុប ដែលសម្រាប់បែងចែកទៅឱ្យពលរដ្ឋចំនួន ៦១៤គ្រួសារ។

អភិបាលរងខេត្តមណ្ឌលគិរី លោក នួន សារ៉ន បានបញ្ជាក់ថា ខេត្តមណ្ឌលគិរី ជាខេត្តមួយដែលមិនសូវទទួលរងនូវការគំរាមកំហែងពីគ្រាប់មីន និងយុទ្ធភ័ណ្ឌមិនទាន់ផ្ទុះផ្សេងៗឡើយ។ កន្លងមកមានការងផលប៉ះពាល់ពីគ្រាប់បែបចង្កោមតិចតួចប៉ុណ្ណោះ។

គូសបញ្ជាក់ថា រាជរដ្ឋាភិបាលបានកំណត់ផែនការយុទ្ធសាស្ត្រក្នុងការសម្រេចឱ្យកម្ពុជាជាប្រទេសអស់មីននៅក្នុងឆ្នាំ២០២៥ តាមរយៈការបង្កើតមូលនិធិសម្រាប់បោសសម្អាតមីន និងការចុះអនុវត្តការងារនៅតាមបណ្តារាជធានីខេត្តទាំង២៥៕